ROXAS CITY, CAPIZ- Gin-athag sang Social Worker nga ginpa-bombo sang pila ka mga residente sang Sitio Calumpang, Barangay Culasi, Roxas City, ang natabo sa pagkadula sang ila nga mga pangalan sa listahan sang mahatagan sang ayuda nagikan sa Department of Social Welfare and Development (DSWD).
Sa interview sang Bombo Radyo kay Regielyn Besana, ang nasambit nga Daycare Worker, iya ginpahayag nga gin-hold sang DSWD ang amo nga mga panagalan nga natalana kuntani nga hatagan sang financial assistance bangud sa gina-verify liwat ang ila nga mga datos.
Suno kay Besana, ginkwestyon sila sang City Social Welfare and Development Office (CSWDO) natuhoy sa nasambit nga mga residente, bangud suno diri sa ila, mataas nga porsyon sang amo nga barangay ang Sitio Culasi kag posible nga indi apektado ang mga residente rason nga gin-hold ini.
Pahayag niya, ginatinguhaan nila sa gihapon nga makasulod kag matigayon na nga mahatagan ang amo nga mga residente bangud nga dako man ini nga bulig para sa ila.
Nagpanawagan naman ang natungdan sang kooperasyon sang amo nga mga residente kag ginapangayo ang ila sini nga paghangop sa amo nga hitabo.
Samtang, nagahulat sa subong sang sabat ang Barangay halin sa CSWDO may kaangtanan sa estado sang nasambit nga mga residente.
Interviewed by Bombo Sunnie Mae Constantino Batencila
