ROXAS CITY – Nagalaum ang chairman sang Committee on Infrastructure sa Sangguniang Panlungsod nga maaksyunan sang gobyerno sang syudad ang gina-alungay sang mga tricycle operators and drivers nga suspendihon ang number coding scheme kag dugangan ang mga inadlaw sang ila nga pagbiyahe.
Ginpahayag ni City Councilor Midelo Ocampo nga naintiendihan sini ang sentimyento sang mga tricycle drivers nga nabudlayan na sa ila nga sitwasyon bangud sa nangin epekto sang covid-19 pandemic.
Suno kay Ocampo nga ginkumpirma man sa iya ni Councilor Albert Gregory Potato, chairman sang Committee on Transportation and Public Utilies nga ginakunsidera sini kalakip sang alkalde sang syudad ang gina-apelar sang mga tricycle drivers angut sa odd-even scheme kag pagpalawig sa adlaw sang pagbiyahe.
Posible nga pagatalakayon ini nga isyu sa masunod nga sesyon sang city council.
Magluwas diri, ginpalab-ot ni Ocampo nga ginahinyo man sang mga concerned nga tricycle drivers sa gobyerno nga dugangan ang numero sang mga pasahero nga nagasakay sa ila tricycle.
Apang ba-se sa ordinansa nga kasunod sa pagpasaka sang pletehan sa tricycle ang pagpatuman sang one passenger policy.
