ROXAS CITY – Wala gin-aprubahan sang Sanggunian Panlalawigan ang gina-request ni Board Member Eliuper Martinez sa ginpatigayon nga session sang damlag lang kun sa diin naga-request ini nga i-transfer ang pondo sa opisina sang Provincial Administrator.
Ini ang ginpahayag ni Board Member Jonathan Sonny Besa sang mainterview sang Bombo Radyo.
Suno kay Besa nga nadesisyunan ini ni Martinez bangud pila ka mga empleyado ukon staff sini sa iya opisina ang wala pa maswelduhan rason nga ginhimo niya in nga desisyon.
Wala ginpirmahan ni Vice Mayor James Mitang Magbanua ang request ni Martinez rason nga gin-hold ini.
Mahibaluan ang kabilugan nga gina-request sini nagalab-ot sa P1,562,000 kun sa diin ang P1,170,000 diri ang pakadto sa opisina sang PA kag ang P392,000 amo ang mga request ukon distribusyon nga ginpaabot man sa iya sang nagkalain-lain nga mga kabarangayan.
Ginpahayag ni Besa nga P392,000 lamang ang ginpondohan bangud para ini sa mga purchase request nga nabaton niya sa iya opisina kun sa diin deadline na sa Biyernes rason nga gin-aprubahan naman ini sang SP.
Dugang pa ni Besa nga nagkuha sila sang opinyon sa Department of the Interior and Local Government (DILG) kun sa diin ginapahayag nga ilegal ang request ni Martinez samtang ginahulat pa man nila ang opinyon sang COA.
Suno kay Besa nga sala ini nga proseso kag mahimo nga makompromisa sila bangud si Martinez ang kalakip sa Legislative Branch kag indi sa Executive Department.
Mahibaluan nga makapila ka beses na nagbalik-balik ang kontrata ni Martinez sa opisina sang bise gobernador.
Samtang, ginpahayag naman ni Besa sa tion nga maaprubahan ini sang Sangguniang Panlalawigan may posibilidad nga kwestyunon ini sang korte kag si Magbanua.
