ROXAS CITY – Ginbuhinan ni Capiz Governor Esteban Evan “Nonoy” Contreras ang gina-request nga supplemental budget sang apat ka mga district hospitals sa probinsya sang Capiz para sa Covid-19 Pandemic.
Suno sa pahayag ni Board Member Jonathan Sonny Besa nga 12.9 milyones ka pesos ang ginrequest nga supplemental budget sang Bailan District Hospital apang 8 milyones ka pesos lang ang gin-aprubahan sang gobernador, 15.3 milyones naman sa Dao District Hospital apang 8 milyones lang ang gin-aprubahan, 12 milyones sa Mambusao District Hospital apang 8 milyones lang ang gin-aprubahan, kag 8.3 milyones ka pesos naman ang ginarequest nga supplemental budget sang Tapaz District Hospital apang 4.3 miyones lang ang gin-aprubahan.
Apang suno kay Besa ang 59.8 milyones pesos nga ginarequest nga supplemental budget sang Roxas Memorial Provincial Hospital ang wala ginbuhinan sang nasambit nga gobernador.
Bangud diri, ginhinyo ni Besa nga liwaton sang 4 ka mga district hospital ang request for supplemental budget bangud wala nagasantu sa ila ginahinyo nga pondo ang gin-aprubahan sang gobernador.
Gin-abisuhan naman ni Besa ang mga ini nga kun may yara sang mga emergency nga kinahanglanon ang tagsa ka mga ospital mahimo nga makuha ang pundo gikan sa 5% sang 2020 calamity fund.
