ROXAS CITY – Ginpanginwala sang kagawad sang Barangay Duran, Dumalag, Capiz nga may kahilabtanan ang mga opisyales sang barangay sa ginaalegar anomaliya sa listahanay kag distribusyon sang social amelioration program (SAP).
Ginpahayag ni barangay kagawad Abraham Fantilaga nga indi sila ang dapat basulon sang wala madala sa listahan sang benepisyaryo sang cash assistance sang Department of Social Welfare and Development (DSWD), bangud ang nagahatag sang final approval amo ang Municipal Social Welfare and Development Office (MSWDO) sang Dumalag.
Aminado ang opisyal nga sila sa barangay kalakip ang mga BHWs ang naga-validate sa listahan apang gilayon nila ini nga ginasumiter sa MSWDO nga amo ang naga-aprubar sa pinal nga benepisyaryo sang SAP.
Kasunod sini ginhangkat ni Fantilaga ang nagareklamo angut sa ginaalegar iregularidad kag indi patas nga listahanay kag distribution sang SAP nga magpadulong sa barangay hall agud ila ini mapaathagan.
Matandaan nga nagpalab-ot sang reklamo sa Bombo Radyo ang isa ka concerned citizen sa diin nag-alegar nga madamo nga indi kwalipikado nga indibidwal ang nalakip sa listahan kag nakabaton sang P6,000 nga cash assistance.
