Nagpagwa sang opisyal nga pahayag ang Partido Demokratiko Pilipino (PDP), may kaangtanan sa report angut sa gin-alegar arrest warrant gikan sa International Criminal Court (ICC) batok kay Senador Ronald “Bato” Dela Rosa.
Suno kay PDP Vice National Spokesperson Ferdinand Topacio, kun mapamatud-an nga matuod ang nasambit nga warrant, isa naman ini ka tuman nga paglapas sa soberanya kag kahilwayan sang Pilipinas bilang isa ka hilway nga pungsod.
Ginpakamalaut man sang partido ang administrasyon ni Marcos sa ginaalegar nga padayon nga pagkooperar sa ICC apisar nga nagbiya na ang pungsod sa Rome Statute.
Ginpanindugan sang grupo nga ang gobyerno dapat magpamatuod sang iya kaugalingon nga jurisdiction kag indi pagtugutan nga maapektuhan ang dignidad sang hilway nga pungsod kag indi mag-akto bilang isa ka “neo-colonial lapdog” sang Western powers.
Ginpahayag man sini nga indi na dapat pagtugutan nga masulit pa ang pagkatalaw kag pagtraidor nga ginhimo batok kay former President Rodrigo Duterte.
Ginhatagan man pagtamod sang Partido Demokratiko Pilipino nga si Dela Rosa ang ginpili sang minilyon ka mga Pinoy kag dapat protektahan ang iya kinamatarung kag due process.
Ginpasalig sang partido nga gamiton ang tanan nga legal nga pamaagi agud depensahan indi lang si Senador Dela Rosa kundi pati man ang kinamatarong sang tagsa ka Pilipino batok sa ginaalegar pagpang-abuso kag pamulitika.
Nagpanawagan man ang Partido Demokratiko Pilipino sa publiko nga pamatukan ang ano man nga tikang nga suno sa ila paglapas sa kinamatarung sang pumuluyo, pinaagi sa legal nga paagi.
