ROXAS CITY – Isa ka ginaalegar fetus ang nasapwan sang isa ka ginang sa kilid sang iya tindahan sa Barangay Tanque, sining syudad subong nga aga.
Suno kay Manang Gel ginkakibot sini sang makita sa semento ang ginapatihan fetus.
Agud masiguro iya ini gintsekyar sa diin nakita sini ang kamot kag tiil nga iya sang lapsag.
Nagapati ang ginang nga posible sang kaaganhon ini ginhaboy ukon gintaban sang ido, bangud antes sila magbiya sa ila pwesto kagab-I wala nila ini makita.
Ginapatihan man nga tatlo tobtob apat ka bulan ang nasambit nga fetus nga ginhaboy sang wala mahibaluan nga iloy.
Bangud sa nabatyagan nga kaluoy sang ginang sa fetus, iya ini ginputos sa plastic kag ginlubong.
Ginsindihan man niya ini sang kandila kag ginpangamuyuan bangud tuman gid nga naluoy si Manang Gel sa sitwasyon sang fetus nga ginhaboy lamang sang wala makilala nga iloy.
