Patay ang ginapatihan nga katapo sang New People’s Army (NPA) samtang pilason naman ang isa ka soldado sa engkwentro nga nagluntad sa Barangay Humay-humay, sang aga sang Mayo 1, 2025.
Suno kay Police Lt Jerome de Lara, deputy chief sang Guihulngan City Police Station, nakit-an ang bangkay sang lalaki nga rebelde sa ginpatigayon nga clearing operation matapos ang pagbayluhanay sang lupok sang armas-luthang. Narekober man sa lugar ang isa ka M16 rifle, mga bala, personal nga mga gamit, kag mga dokumento.
Gilayon man nga gindala sa ospital ang pilason nga miyembro sang Philippine Army.
Bangud sa insidente, temporaryo nga nag-evacuate ang pila ka mga residente sa mas luwas nga lugar. Padayon ang pagdeterminar sang City Social Welfare and Development Office ukon CSWDO kun pila ang mga apektado nga pamilya.
