ROXAS CITY -Nagpatawag sang sinapol ang pamunuan sang Roxas Memorial Provincial Hospital (RMPH) angut sa ginaalegar kinawatay nga nagakahinabo sa Dietary Section sang nasambit nga ospital.
Ini ang ginkompirmar ni Ms. Tessa Miranda, Administrative Officer IV sang RMPH sang mainterview sang Bombo Radyo.
Ginpahayag ni Miranda nga aminado ini nga sang una pa ginpalab-ot sa iya talatapan ang alegasyon nga pagkinawatay sang mga pagkaon kag mga panakot sa amo nga ospital apang wala sang may naga-ako nga emplyeado kag wala man sang ebindensya nga makapamatuod sini.
Suno kay Miranda nga may pila ka mga empleyado ang gina-alegar nagadala sang pagkaon nga ginaluto gikan diri, kag nagakadula man ang mga panakot nga ginagamit sa pagluto sa mga ginapakaon nga mga pasyente.
Gindugang pa sini nga makapila ka beses na nga nagdihon sang pagsulundan ang mga staff sang RMPH apang may yara gid sang mga nagakalipat nga mga empleyado.
Samtang liwat nga ginsapol ni Miranda ang mga staff agud matapna ang gina-alegar kinawatay nga nagakahinabo.
Nagpaandam naman si Miranda nga may salabton ang empleyado nga mapamatud-an nga nagapangawat sa nasambit nga ospital.
