ROXAS CITY – Yara na sa kustodiya sang Roxas City Police Station ang ginaalegar mga marijuana plants nga nakit-an sa Kilometer 1, Barangay Lawaan, Roxas City.
Sa interview sang Bombo Radyo kay Punong Barangay Jocelyn Asis, ginpahayag sini nga personal nga nagpadulong sa iya ang chief tanod sang ila barangay nga si Renee Andong bitbit ang isa ka improvised pot nga may tatlo ka puno sang suspected marijuana.
Suno kay Andong, nakit-an ang nasambit nga tanom sang isa ka residente nga nagapauli na kuntani sa ila balay.
Kumbinsido si Andong nga gin-abandonar ang nasambit nga tanom bangud nakit-an lamang ini sa kilid sang karsada rason nga ginpakamaayo sini nga bitbiton ini sa talatapan ni Asis.
Ginpakamaayo naman ni Asis nga dal-on sa estasyon sang pulisya ang nasambit nga tanom.
Sa karon indi pa makompirmar sang Roxas City PNP kun marijuana gidman ang nakit-an nga tanom bangud ila pa ini nga ipaidalom sa beripikasyon.
