ROXAS CITY -Nagpatigayon sang imbestigasyon ang Provincial Internal Affairs Services (PIAS) sang Capiz Police Provincial Office (CPPO) natuhoy sa ginareklamo nga pagpangastigo sang isa ka pulis sa Barangay Damayan , Sapian, Capiz.
Ini ang ginpahayag ni Police Lieutenant Colonel Erwin Margarejo, hepe sang CPPO-PIAS sang mainterview sang Bombo Radyo.
Ginpahayag ni Margarejo nga ginahulat nalang sini nga magpasaka sang panumbungon ang tagreklamo nga si Diolito Diestro batuk sa pulis nga gina-alegar nagkastigo sa iya nga si Police Master Seargent Allan Occenio.
Suno diri nga personal siya nga nagpadulong sa banwa sang Sapian kag gin-usisa ang biktima kag ang ginareklamo nga pulis.
Suno kay Margarejo nga may yara sang kinamatarong ang mga pulis nga mag gamit sang “reasonable force” para sa mga nagabato nga indibidwal sa mga nagaresponde nga mga kapulisan apang likawan man nga magsobra tubtob sa makasakit sa na sila sa sibilyan.
Gindugang pa sini nga nagakinhanglan nga magpresentar sang mga nakaigo nga ebidensya ang magtimbang nga bahin agud pamatud-an ang ila tagsa ka alegasyon.
Ginpanindugan ni Margarejo nga bukas ang ila talatapan pananglitan magpasaka sang panumbungon batuk sa pulis si Diestro.
Mahimo naman nga mapa-relieve sa pwesto si Occenio sa tion nga pormal na nga magpasaka sang panumbongon ang pamilya Diestro.
