Ginpanindugan sang pinuno sang CAPENRO nga sang nagliligad pa nga mga binulan ginpa-untat ang quarry operation nga ginpatigayon sang Provincial Engineer’s Office (PEO) sa area sang captiol hills subdividion sa Barangay Lanot, sining syudad.
Ginpahayag ni Atty. Emilyn Depon nagpatigayon na sila sang hinun-anon sang PEO matapos natukiban ang nangin aktibidad sang departamento kag ginpauntat sini ang operasyon samtang gina-review ang development plan.
Suno pa sa opisyal nga kinahanglan man nga magsecure sang special transport permit kun ginapaguha ang anuman nga waste material bangud kun wala sang mapakita nga delivery permit ang driver mahimo ini nga multahan sang P2,000 sa 1st offense, P3,000 sa second offense kag P5,000 sa 3rd offense.
Masami nga gina-isyuhan sang citation ticket ang madakpan nga driver sang truck nga wala sang permit.
Ginklaro pa sang pinuno sang CAPENRO, kinahanglan nga madakpan sa akto nga nagapatigayon sang extraction ukon quarry operation para mapatigayon ang enforcement sang laye.
Apang sa kaso nga yara lamang sa lugar ang isa ka heavy equipment kag wala naga-function indi makasiling nga nagpatigayon sang operasyon.
Nagpanawagan man si Depon sa publiko nga pananglitan may yara sang nahibaluan nga nagapatigayon sang quarry operation, gilayon lamang sila impormahon agud ila matsekyar.
Samtang ginapanindugan sini nga bisan ang gobyerno probinsiyal, dapat magsunod sa laye pag-abot sa paghatag proteksyon sa palibot.
