ROXAS CITY – Ginahulat pa sang mga kapulisan ang pagbalik sang apat ka mga persona nga nagpabalhag sa ila talatapan agud ipadayon ang pagpasaka sang kaso sa ginaalegar nagtanyag sa ila sang vote buying sa Brgy. Salcedo banwa sang Dumarao.
Sa pagpakig-angut sang Bombo Radyo kay P/Capt. Almarino Bunior, ginpahayag sini nga nagapadayon pa ang ila imbestigasyon sa nasambit nga isyu.
Matandaan, nga nagparekord sa Dumarao Municipal Police Station ang apat ka persona, ginkilala nga sanday alyas Marites, Marisol, Mario kag Marco matapos ginpangakuan nga hatagan sang tig P2,000 kabaylo sang indi nila pagboto.
Apang, natapos lang ang eleksyon wala gid nagtupa ang ginpromisa sa ila.
Samtang, indi pa matuad ni Bunior kun kay sin-o nga partido ang ginareklamo sang nasambit nga mga persona.
