ROXAS CITY– Masobra 100 na ka mga barangays sa Capiz ang ginabaha kasunod sang wala untat nga pag-ulan nga dala sang bagyo nga Agaton.
Sa interview kay rovincial Disaster Risk Reduction and Management Office (PDRRMO)- Capiz action Officer Esperidion Pelaez, ginpahayag sini nga lauman pa nga madugangan ang numero sang mga ginabaha nga mga barangay bangud padayon pa tubtob subong ang pagbubu sang mamunog nga pag-ulan.
Suno pa kay Pelaez nga nagapabilin man nga indi maagyan ang pila ka mga karsada sa probinsiya kag pila pa diri ang naglab-ot na liog ang lebel sang tubig.
Kaangot sini, naglab-ot sa 155 ka mga pamilya ang napagkit nga evacuees nga yara sa evacuation center bangud ginsulod na sang tubig ang ila mga balay kag iban diri ang apektado sang natiphag nga duta.
Gindugang pa ni Pelaez nga nagpatuman man sang force evacuation sa napulo ka mga pamilya sa banwa sang Dumalag matapos mag-awas ang tubig sa suba kag nagsulod sa ila tagsa ka mga puluy-an.
Samtang, nagdeklarar na sang kanselasyon sang klase para buwas nga adlaw si Capiz Governor Antonio del Rosario sa tanan nga lebel sa pampubliko kag pribado nga eskwelahan sa probinsiya.
Sa karon, nagpalab-ot naman sang bulig ang gobyerno probinsiyal sa mga apektado nga mga residente ilabi na ang pamilya nga yara sa evacuation centers.
