ROXAS CITY – Nagalain ang buot sang 30 anyos nga iloy bangud kasubong ginabaliskad pa siya sang pamunuan sang City Health Office sang nagdepensa ang nasambit nga talatapan natuhoy sa ila pagbalibad sa ginang nga makaanak sa ila birthing center.
Suno kay Liezel Anonoy-Gregorio, 30 anyos sang Sitio Luyo, Barangay Culasi, Roxas City, kumpleto siya sa papeles nga ginapangita sang talatapan.
Ginpahayag sini nga bitbit nila ang iya nga pre-natal records kag laboratory results.
Nagalain man ang buot sang ginang bangud sa pahayag sang nasambit nga talatapan nga indi pa man siya manugbata sang tion nga nagkadto sila sa birthing clinic bangud suno sa iya, bisan blood pressure, wala gid siya ginkuhaan.
Suno diri nga ginsid-ing pa sang iya utod sa bintana bangud sa kutob lamang sila sa guwa kag didto nakit-an nga masako sa pag-istoryahanay kag pagpanalamin ang mga staff.
Gin-guwa pa suno diri ang iya utod kag ginsita kasunod sang pagbalik sang iya mga papeles kag ginhatag ang referral letter.
Nagreklamo pa suno diri ang iya utod sa staff bangud kasubong ginapaawat-awatan sila kag ginhambal ang mga tinaga nga ‘PAANO ABI KUN MAGBATA ANG UTOD KO DIRI?’ apang ginsabat lamang sila nga ‘HAY KUNDI PABATA-ON TA!’.
Suno diri nga ginhambalan lang sila nga maglakat na sa Roxas Memorial Provincial Hospital kag didto magbata.
Bangud diri suno sa ginang, napilitan sila maglakat bangud kasubong gintabog sila sang mga staff.
Matandaan nga napilitan ang ginang nga mag-anak sa ila balay pinaagi sa isa ka paltera matapos ginbalibaran sang amo nga talatapan kag sang duha pa gid ka pribado nga birthing clinics.
Gilayon man nag-isyu sang pahayag si City Mayor Ronnie Dadivas kun sa diin gina-kondenar sini ang ginhimo sang tatlo ka mga birthing clinic nga gintawag sini nga isa ka sahi sang diskriminasyon.
Natalana nga mag-atubangay subong nga adlaw ang magtimbang nga kampo sa talatapan sang alkalde kag nagalaum ang ginang nga pamatian ni Dadivas kag pasabton ang dapat nga manabat agud indi pa pagpamarisan ang nasambit nga hitabo.
