Ginabanta Lima ka tonelada nga carrots nga ginkarga sa isa ka truck ang nakita nga ginhaboy sang isa ka mangunguma sa kilid sang dalan sa banwa sang Tublay sa probinsya sang Benguet bangud sa posible oversupply ukon manubo nga presyo.
Ginpanginwala naman sang tagdumalahan sang Benguet Pinoy Agri Trading Center nga naghalin sa ila ang nasambit nga carrots nga simple lang nga ginhaboy sa dalan sang mangunguma bangud ginaalegar nga ginabaligya nila sa mas manubo pa nga presyo ang gindala sa ila.
Ginpahayag pa sang Trading Center nga sa tion nga indi mabaligya ang mga carrots, ila ini ihatag sa mga institusyon samtang ginasiguro sa gihapon nga mahatagan sang nagakaigo nga bayad ang mga mangunguma.
Ginapahayag nga may yara man sila sang mga inisyatibo agud masabat ang pagsaka-panaog sang presyo sang mga utanon kag merkado.
Samtang, ginpahayag sang mga mangunguma nga mas madamo pa ang ila mapierde kon itanum nila liwat ang ila ginpatubas.
Suno sa monitoring sang Agricultural Industry Association (SINAG), ang carrots didto nagalab-ot lamang sa manubo nga presyo nga P3 tubtub P10 kada kilo, gani posible nga mas gusto sang mga mangunguma nga ihaboy ini.
Natalana naman nga imbestigahan sang Department of Agriculture (DA) ang nasambit nga insidente.
