ROXAS CITY – Dako ang mabulig sa mga Agrarian Reform Beneficiaries (ARB) ang ginadihon sa karon nga proyekto sang Department of Agrarian Reform (DAR) nga ginatawag Proyektong Benteng Bigas Para Sa Mamamayan (PBBM).
Sa interview sang Bombo Radyo kay Provincial Agrarian Reform Program Officer II Anthony Arostique, ini ang sabat sang ila ahensiya sa national nga lebel, sa direktiba ni President-elect Ferdinand “Bongbong” Marcos Jr. nga maghimo sang tikang agud mapanubuan ang presyo sa kada kilo sang bugas sa Pilipinas.
Suno diri, wala pa sang direktiba sa ila sa lebel diri sa Capiz, bangud ang nasambit nga proyekto nga PBBM ang gina-conceptualize pa lamang.
Apang, kun mapondohan kag maimplementar ang ginaplano nga proyekto, makaagum sang direct nga subsidiya ang tag-iya sang duta para sa produksiyon sang bugas sa Capiz.
Nahibaluan nga 40 porsyento sa 50,000 ka ektarya sang duta nga panag-iya sang ARB’s ang iya sang rice production kag isa man ang probinsya nga naga-produs sang bugas sa Western Visayas.
