ROXAS CITY – Dako nga bulig sa mga pumuluyo ilabi na sa mga motorista ang ginaduso nga ordinansa sa syudad nga magsuksok sang helmet.
Sa interview sang Bombo Radyo kay Mr. Gonzalo Andrada pinuno sang Traffic Management Unit (TMU) Capiz ginpahayag sini nga pinaagi sa amu nga ordinansa, mabuhinan ang numero sang mga motorista nga yara sa delikado nga sitwasyon ukon pagkamatay bangud sa mga patal nga pilas nga naangkon sa ila ulo.
Suno kay Gonzalo, isa sa mga rason nga ginatunaan sang kamatayon sang mga motorista ang wala pagsuksok sang helmet kag kun may yara man ang iban ginabitbit lamang sa baylo nga isuksok ini.
Angut sini, magapatigayon man sila sang training ukon paghinun-anon kaupod ang mga tanan nga mga TMU agud tun-an kag ipahibalo kun anu ang mga tikang nga dapat ipatuman kag mga penalidad nga ihatag sa isa ka motorista sa tion nga nagapakatig-a ini nga magsunod.
Sa oras nga mapatuman sa syudad ang amu nga ordinansa, magahatag pa sila suno diri sang konsiderasyon sa una nga adlaw sa mga motorista agud mapahibalo ang mga ini.
Apang, pananglitan nga makapila na ka beses nila ini madakpan kag wala sa gihapon nagasunod may yara na sang mga penalidad nga paga-atubangon.
Mensahe ni Gonzalo sa tanan ilabi na sa mga motorista, magkooperar kag magsunod sa ginapatuman sang gobyerno bangud indi lamang sila ang makaganar sini kundi subong man tanan.
