Nagapati si Capiz 2nd District Board Member Gilbert Ardivilla nga suportahan sang mga kaupdanan sini sa Sangguniang Panlalawigan ang iya ginaduso nga ordinansa nga naga-establisar sang official registry system para sa mga sugar farmers kag planters sa probinsya.
Sa interview sang Bombo Radyo kay Board Member Ardivilla, Chairman sang Committee on Agriculture, iya ginpahayag nga katuyoan sang registry system amo nga makahimo sang reliable kag updated nga database sang mga tawo nga yara sa sugarcane farming.
Suno kay Ardivilla, makabulig ang registry sa provincial government nga makilala ang mga sugar farmers kag planters, ma-check ang ila impormasyon kag maka-plano sang maayo nga programa kag serbisyo para sa sugarcane industry.
Sa idalom sang ordinansa, ang Office of the Provincial Agriculturist amo ang madumala kag ma-maintain sang registry.
Ang registry lakipan sang basic information kaangay sang pangalan kag contact details sang farmer, farm location kag size, land ownership ukon legal basis para sa cultivation, farm production information, organization membership, kag government assistance nga una nga nabaton.
