ROXAS CITY – Gin-eksplekar sang tagdumalahan sang Capiz Electric Cooperative (CAPELCO) nga magapasugot lamang sila sa ginahinyo sang mga konsumedor nga kung mahimo amat-amatan lamang ang pagbayad sang bills sa kuryente.
Sa interview sang Bombo Radyo kay Engr. Edgar Diaz, General Manager sang Capiz Electric Cooperative (CAPELCO), ginpahayag sini nga indi kinahanglan pag-ianggid ang ila ginhimo sadtong pandemic sa subong nga panahon sang tag-ilinit nga na-eksperyensyahan sang kadam-an sa diin nagresulta sang pagdoble nga pagtaas sa pagsuluktan sa bills.
Suno kay GM Diaz, nga sadtong tion sang pandemic may yara sang ginpaguha nga direktiba nga nagikan sa Energy Regulatory Commission (ERC) para sa tanan nga mga power supply.
Pahayag sini nga wala nakabaton sang sulat ang ila talatapan may kaangtanan sini.
Mahibaluan nga kadam-an sa mga konsumedor sang kuryente sa Capiz ang naghinyo sa ila nga kun tani mahimo amat-amatan lamang ang ila pagbayad sang bills ilabi na ang may mga dalagko nga balayaran tuga sang mainit nga tyempo sang mga tinalikdan nga bulan.
Pahayag ni GM Diaz nga indi lamang ang cost ang lantawon sang mga konsumedor kundi kung paano magkonsumo sang kuryente sa puluy-an.
Angut sini, pananglitan suno diri nga makabaton sila sang direktiba nga nagikan sa ERC gilayon nila ini nga ipatuman kag ipahibalo sa publiko.
Sa pihak nga bahin, bangud nagsugod na ang tig-ululan, nagnubo na ang ginakaon nga kuryente sa probinsya kung ikumparar sang nagliligad nga bulan base sa ila nga monitoring.
Mensahe sini sa mga konsumedor ilabi na sa mga rive miller nga kun mahimo magkinot sang kuryente sumugod 6:00 tubtob 9:30 sa gab-i bangud ini ang pick hours kag mataas diri ang power sang kuryente.
