ROXAS CITY – Ang pagkabalaka sa mga Capizeño ang nagtulod sa isa ka board member para magpatigayon sang diskurso pribilihiyo angut sa mga indibidwal nga nagsalig sang ila hard earned money sa double your money investment scheme nga nangin lapnagon sa sosyudad.
Ginpahayag ni Board Member Ricky Martin nga luyag lamang sini pabugtawon ang mga na-biktima sang double your money scheme sa probinsiya nga mahimo pa nila mabawi ang ila nga investment, pinaagi sa pagfile sang panumbungon batuk sa mga CEO sang mga investment scheme.
Nalipay man ang opisyal bangud sa amat amat nakabugtaw na ang mga Capizeño, rason nga naghulag na sila kag nadakpan sa entrapment operation sang NBI ang CEO sang 25 days double your money investment scheme nga si Junelyn Gregorio.
Nahibaluan nga madamo nga mga indibidwal nga nag-invest sa amo nga mga investment scheme ang nagpadulong sa balay ni BM Martin sa diin gilayon ini nga nagpakig-angut sa mga abogado agud kunsultahon kun may tsansa pa nga mabawi sang mga investors ang ila nga kuwarta.
Suno kay Martin nga wala na sang pay-out nga matabo bangud hugot nga ginabantayan sang NBI kag SEC ang hulag sang mga CEO kalakip sang mga malapit sa ila.
Ginapanindugan man sini nga tuman ka imposible ang ginapabugal ni Don Chiyuto nga ma-doble ang imo kuwarta sa isa ka bulan bangud indi ini trading nga matawag kundi pyramid scheme.
Samtang indi apektado si Martin kun mabutang sa alang alang ang iya political career bangud nangin vocal ini pag-abot sa kontrobersiyal nga investment scheme.
Suno sa board member nga ginapakigbato lamang sini ang makapaayo sa mga pumuluyo bangud kabahin ini sang ila ginsumpaan sang nagapangampanya.
