ROXAS CITY – Ginakonsiderar isa ka gabunan ang ginakabig High Value Individual (HVI) nga nakuhaan sang mga armas-luthang, bala kag ginapatihan iligal nga droga, pinaagi sa gin-implementar nga search warrant sang mga kapulisan, sa San Vicente Ville, Sitio Crossing, Barangay Bato, Panay Capiz sadtong Hulyo 14.
Matandaan nga ginkilala ang nadakpan kay Ramiro Cordova Camacho, 55-anyos, Top 1 Priority list (provincial level) kag residente sang nasambit nga barangay.
Sa interview sang Bombo Radyo kay PCPT. Gary Diaz hepe sang Panay Municipal Police Station ginpahayag sini nga masobra lima ka bulan nila nga gin-obserbahan si Cordova antes natigayon ang amu nga operasyon.
Nakuha sa kontrol kag posesyon ni Camacho ang 2 ka unit sang calibre .45 nga indi lisensyado, duha ka magazine, 19 tanan ka mga bala sang nasambit nga armas-luthang, hand grenade, kag 6 ka sachet sang ginapatihan iligal nga droga nga may standard drug price nga P204,000.
Ang search warrant ang gin-isyu ni Hon. Lorencito Diaz, Vice-Executive Judge, RTC, 6th Judicial Region, Roxas City, Capiz napetsahan Hulyo 13, 2023.
Kaso nga paglapas sa RA 9516 ukon “Illegal possession of explosives”, RA 10591 ukon “Comprehensive firearm and ammunition act” kag Republic Act 9165 ukon Comprehensive Dangerous Drugs Act of 2002 ang paga-atubangon ni Camacho.
Nagalaum naman si Diaz nga mahagan-hagan na ang illegal nga buluhaton sa banwa sang Panay kag mangin drug cleared.
Sa karon, ang gin-aresto ang nagapabilin sa kustodiya sang Panay Municipal Police Station, para sa nagakaigo nga disposisyon.
