IVISAN CAPIZ – Dakop ang ginakabig Priority High Value Individual, matapos ma-implementaran sang search warrant sa Poblacion Norte, Ivisan Capiz.
Sa interview sang Bombo Radyo sa Public Information Officer sang Capiz PPO nga si PCapt. Merry Chris Dela Cruz, ginkilala ang nadakpan kay Fredgil Uguil, 42-anyos kag residente sang nasambit nga lugar.
Suno kay Dela Cruz, madugay na nila nga ginamonitor si Uguil kag kahapon nga adlaw madinalag-on nila ini nga nadakpan.
Mahibaluan nga nakuha sa posesyon sini ang 1 unit sang caliber .38 revolver, 2 caliber .45 pistol, 1 unit sang 9mm automatic rifle, 1 granada mga magazine kag bala.
Dugang pa nga nakuha ang 3 ka sachets sang ginapatihan shabu, sling bag, 1 awto nga salakyan nga nagaduag pula, kag 5 ka unit sang motorsiklo.
Dugang pa ni Dela Cruz nga anay na nga napreso si Uguil sa kaso nga pagpangawat kag pagpangluthang sa probinsya sang Capiz.
Kaso nga paglapas sa Republic Act No. 10591 ukon Comprehensive Firearms and Ammunition Act, Republic Act 9516 ukon Illegal Possession of Explosives or Incendiary Device kag Republic Act 9165 ukon Comprehensive Dangerous Drugs Act of 2002 ang paga-atubangon sang suspek.
Sa karun yara na ini sa kustodiya sang Ivisan MPS, para sa nagakaigo nga disposisyon.
