ROXAS CITY -Nagapangayo sang bulig sa gobyerno sang siyudad ang isa ka ginang matapos nga gintaop sang baha ang sulod sang ila balay sa Sitio Jail, Barangay Lawaan, Roxas City.
Ginpahayag ni Manang Tara nga nagalab-ot sa hawak ang kadalumon sang baha nga nagasulod sa ila balay.
Gindugang pa sini nga magluwas nga madalom, mabaho pa ang tubig nga nagataop sa ila balay.
Nagakahangawa man ini sa amay nga masami nga nagatubog sa baha, bangud nagakatol na ang mga tiil sini sa kahigko sang tubig.
Suno pa sa ginang, nga humalin sang gintambakan ang gina-iligan sang tubig, nagsugod ang pagbaha sa ila.
Samtang ginkompirmar man ni Manang Tara nga ginpadulongan ni Punong Barangay Jocelyn Asis ang ila nga balay kag gindal-an sang water pump agud temporaryo nga masuyop ang tubig-baha.
Nagpasalig man suno dri ang City Engineering Office nga hatagan sang solusyon ang problema sang pila ka mga panimalay nga gina baha tagsa ka magbubo ang mamunog nga ulan.
