ROXAS CITY-Dismayado 50-anyos nga ginang matapos nga wala makabaton sang ayuda sa idalom sang Social Amelioration Program (SAP) sang Department of Social Welfare and Development (DSWD) sa Barangay Baybay, Roxas City.
Suno kay Mrs. Angelita Caro nga ginlista ang iya pangalan sang barangay health worker (BHW’s) sa listahan nga makabaton sang P6, 000 nga ayuda apang pag-abot sa validation, ginkakas ang iya nga pangalan.
Gindugang pa sini nga nagalain ang iya buot bangud ang mga iban nga mga indi kwalipikado nga makabaton sang bulig pinansyal ang nalakip sa listahan.
Ginpabutyag sini nga wala ini ginlakip sa mga makabaton sang bulig pinansyal bangud indi ini botante sang barangay kag iya bana ang nagatrabaho sa gobyerno.
Apang ginpanindugan ni Caro nga naga trabaho bilang security guard sa isa ka priabado nga kumpanya ang bana sini kag wala sa gobyerno.
Samtang nagareklamo man si Caro bangud gintungaan lamang ini sang tunga sa sako nga bugas nga nabaton sang iya kaingud-balay.
Mahibaluan nga sang ginpadulongan sang Bombo Radyo Roxas ang balay ni Caro nakit-an ang makaluluoy nga sitwasyon sini kun sa diin nagapangutan sang utananon ang nasambit nga ginang para may ipakaon sa pamilya.
Nagapelar naman ang ginang sa City Social Welfare and Development nga malakip ini sa listahan nga makabaton sang bulig-pinansyal.
