ROXAS CITY – Personal nga nagdangop sa estasyon sang Bombo Radyo Roxas ang 61-anyos nga ginang agud ireklamo ang wala paghatag sang iya nadag-an nga premyo sa pa-bingo sang Personal Collection Direct Selling Incorporated.
Ang nasambit nga tagreklamo amo si Nelly Laurente sang Barangay Timpas, Panitan, Capiz.
Suno kay Laurente, may gindihon nga pahampang ang amo nga kompaniya kun sa diin mahimo sila maka-intra sa binggo sa baylo nga makabakal sila sang P2, 500 nga balor sang home-care products.
Bangud diri, gintinguhaan man sang ginang nga makabakal sang masobra P2,500 sang mga produkto agud makapasakop sa pa-bingo.
Suno diri nga sadtong Pebrero 26 ginpatigayon ang pa-bingo kun sa diin may yara siya sang duha ka bingo cards.
Mahibaluan nga ang nasambit nga pa-bingo ang electronic kag nationwide sa mga branches sang Personal Collection Direct Selling Incorporated kag may yara sang 15 ka mga tagdaog sang P10, 000 nga balor sang produkto kag P10, 000 nga cash.
Ginpahayag ni Laurente nga sa ika-walo nga draw sang bingo, nagdaog siya matapos naguwa ang numero 30 nga yara sa iya nga card.
Bangud diri gilayon nga naghambal ang ginang nga siya ang nagdaog apang ginhambalan ini sang manager sang nasambit nga kompanya nga hulaton lamang sini nga makabingo.
Suno sa ginang nga natapo lamang ang draw apang wala gid siya gindeklarar nga nagdao kag sa ulihi ginhambalan na lamang ini sang manager nga wala nakasulod sa system ang card sini rason nga wala ini nagdaog.
Nagapanindugan si Laurente nga siya ang ikawalo nga tagdaog sang amo nga pahampang kag luyag sini karon nga makuha ang iya nadag-an nga premyo.
