ROXAS CITY – Nadulaan sangtrabaho bangud sa COVID-19 kag pagsakit sang tiyan bangud sa gutom ang nagtulod sa isa ka amay nga magpangawat para may makaon ang pamilya.
Ini ang ginpahayag sang makawat sa tag-iya sang balay nga si Grace sang Barangay Dayao, Roxas City matapos naaktuhan nga yara sa sulod sang balay kaupod ang isa ka solterito nga lunsay may mga tabon ang nawong.
Aminado ang ginang nga nahadluk ini kag nabalaka sa mga kabataan nga kaupod sini sa balay sang tutukan siya sang kutsilyo sang suspek.
Apang ginpahayag sang suspek nga wala ini sang plano nga sakiton ang mag-iloy kag ang tuyo lamang amo ang kuwarta kag pagkaon para may makaon ang nagutom nga anak matapos madulaan sang trabaho bangud sa COVID-19.
Bilang ginikanan nakabatyag sang kaluoy ang ginang sa suspek, gani naghambal ini nga kuhaon na lamang ang tanan nga pagkaon sa refrigerator kag kuwarta nga nagalab-ot sa P5,500 sa iya nga bag.
Kalakip sa mga pagkaon nga gindala sang suspek nga ginsulod sa punda sang almohadon amo ang marinated na bangus, salad, hotdog, noodles, chocolates kag iban pa.
Nagpasalamat naman ang makawat kasunod ang pagpangayo sang pasaylo sa ginang nga kinahanglan pa sini nga magpangawat para may makaon ang gutom nga pamilya.
Samtang suno sa ginang nga sa pihak nga may tabon sa nawong ang suspek, makilala niya ini sa gihapon kun iya makita.
Nahibaluan nga kaupod sang ginang ang duha ka menor de edad nga mga anak sa balay sang natabo ang pagpangawat bangud yara sa trabaho ang bana nga isa ka miyembro sang Philippine Army.
