ROXAS CITY – Patay ang isa ka 29-anyos nga ginang matapos nga nakuryente sa sulod sang ila puloy-an sa Barangay Poblacion Ilawod, Cuartero, Capiz.
Base sa inisyal nga imbestigasyon sang Cuartero Municipal Police Station nga magalaba kuntani ang wala na ginhingadlan nga biktima sang ginaalegar nga nakuryente ini matapos ginsaksak sa extension ang saksakan sang iya nga washing machine.
Bangud diri, hinali na lamang nga natumba ang biktima sa diin nasapwan na lamang ini sang iya anak nga nagahigda na sa salog kag nagapalanggit-um.
Gintingwaan pa nga madala sa ospital ang biktima apang gindeklarar man ini nga dead on arrival sang attending physician.
Nahibaluan nga may yara sang isa ka anak ang biktima kag ang bana sini isa ka seaman nga na-base karon sa luwas sang pungsod.
Sa karon, yara na sa punerarya ang bangkay sang nasambit nga biktima.
Samtang, nagapadayon naman ang imbestigasyon sang mga kapulisan sa nagluntad nga insidente.
