ROXAS CITY – Ginkumpirmar sang hepe sang Jamindan Municipal Police Station nga may isa ka ginang nga nagabusong nga na-alangan kag nagbun-ag sa border security checkpoint sa Barangay Lucero kag Pasol-o border Jamindan, Capiz.
Ginpahayag ni Police Captain Peter John Pisueña nga gikan ang manugbata nga ginang nga si Analyn Casimero sa Barangay Agbun-od kag sakay sa tricycle pakadto sa Rural Health Unit sang Jamindan apang na-alangan sa checkpoint kag diri mismo nagbata.
Suno sa kay Pisueña nagbinuligay ang task force nga mapabata ang ginang sa pagpanguna ni Mr. Randon Alantuson sang municipal disaster risk reduction and management office ukon MDRRMO sang Jamindan.
Aminado ang opisyal nga wala nadala sa training sang task force ang magpabata sang nagabusong apang bangud emerhensya natigayon nga mapabata sang task force ang ginang.
Ginkalipay naman ni Pisueña nga hilway na ang mag-iloy labi na ang lapsag nga babayi nga yara na sa isa ka hospital sa probinsya.
