ROXAS CITY – Dismayado ang isa ka ginang bangud sa ila indi maayo nga kahimtangan nga mga locally-stranded individuals (LSI’s) sa quarantine facility sang Barangay Dinginan, Roxas City.
Suno sa wala na ginhingadlan nga tagreklamo, ginhimo nga quarantine facility ang health center sang ila barangay apang sa iya kakibot, wala sang mga higdaan para sa ila nga mga LSI’s.
Ginpahayag sini nga wala gid sila sang bisan folding beds kag iban pa nga beddings kapareho sang ulunan kag habol.
Suno diri nga indi sila halos makapahuway bangud magluwas sa wala sila sang higdaan, tuman pa ka gin-ot sa amo nga pasilidad.
Nagalain ang buot sang ginang bangud kasubong ginpahamtang sila sa amo nga pasilidad kag ginpabay-an na lamang.
Ginpahayag sini nga nagabuklad lamang sila sang karton para ila nga tulugan.
Gindugang pa sang ginang nga wala man sila sang suplay sang pagkaon kag nagapaluto lamang siya sa iya utod sa ila balay kag ginadul-ungan sila sang pagkaon.
Nagaapelar ang ginang nga kun mahimo magpaidalom na lamang sila sa home-quarantine bangud indi na sini matakudan ang ila sitwasyon.
Mahibaluan nga naghalin ang ginang sa Pavia-Iloilo kag nagpauli sa ila barangay.
Kaupod man sini sa amo nga quarantine facility ang iya apat ka mga kabataan kag lima ka iban pa.
