ROXAS CITY – Padayon nga ginabulong sa Roxas Memorial Provincial Hospital ang isa ka ginang nga gintiro sa Barangay Pangabuan, Jamindan, Capiz.
Nag-angkon sang pilas sa paa ang biktima nga si Rhea Villasis 36-anyos sang Barangay Molit sang amo nga banwa.
Ginpahayag ni Police Staff Sergeant McCornick de la Cruz, imbestigador sang Jamindan PNP nga nagaguwa sa imbestigasyon nga nagpadulong sa balay sang iya utod ang biktima, agud magtambong sa birthday sang iya hinablos
Apang sa wala ginalauman, nagtuga sang kinagamo ang hubog nga suspek nga si Roger Arroyo 54-anyos sang Barangay Pangabuan, Jamindan gani ginhinyo ini nga magpauli na lamang.
Ginkakibot na lamang sang tanan sang nagbalik ang suspek bitbit ang 12 gauge shotgun kag kasunod ang pagtiro kay Villasis nga una sini nakita.
Gilayon gindala sa ospital ang biktima agud madapatan sang nagakaigo nga pagbulong.
Samtang boluntaryo naman nga nagsungka sa mga otoridad si Arroyo nga karon nakahunong na sa karsel sang Jamindan PNP.
