ROXAS CITY, CAPIZ – Nabiktima sang peke nga kwarta ang isa ka ginang nga negosyante sang prutas kag utan sa Barangay Milibili, Roxas City.
Ginkilala ang amu nga ginang kay Imelda Caldeo, 53-anyos nga residente sang nasambit nga lugar.
Sa panaysayon ni nanay Imelda sang ma-interview sang Bombo Radyo, isa ka lalaki ang nagbakal sa iya sang tatlo ka kilo nga sandiya sa balor nga P120.
Ginlaragway sini ang lalaki nga nagbakal nga naka-motor nga nagaduag blue, may suksok nga brown jacket, yellow t-shirt, naka-maong nga short kag madamo sang linibo nga kwarta. Nagbayad suno diri ang lalaki sang bag-o nga P1,000 kag gilayon man sini nga ginsinsilyohan ang lalaki sang P900 kag ginpangayuan sang P20.
Apang tuman ang ila kakibot sang iya nga bana sang gingamit na sang bana sini ang kwarta agud ibakal sa isa ka baligyaan sang spare parts sa syudad kag ginsilingan ini sang kahera nga peke ang amu nga kwarta base man sa ila pagtsekyar sang amu nga balaligyaan.
Wala man suno diri nagsulod sa pinsar sang ginang nga tsekyaron ang P1,000 nga kwarta sa pagsalig nga indi ini peke bangud bag-o ang amu nga kwarta.
Ginpahayag pa sang ginang nga madugay na ini nagabaligya kag ini ang una nga kahigayunan nga nabiktima siya sang peke nga kwarta.
Sa karon, luyag nila i-report sa kapulisan ang amu nga hitabo.
