ROXAS CITY – Disgustado ang isa ka ginang sa Barangay Dinginan sa pamaagi sang pagpanagtag sang tunga sa sako nga bugas nga gikan sa city government sa mga pumuluyo nga apektado sang enhanced community quarantine bangud sa coronavirus disease 2019 ukon COVID-19.
Pinaagi sa Bombo Patrol 101 sa Barangay ginpalab-ot sa hubon sang Bombo News team ni Nanay Florenda Patigan sang Block 1 Alba Village, Barangay Dinginan ang kalain sang buot matapos nga wala nakabaton sang tunga sa sako nga bugas matapos ginpamalibaran nga mahatagan sang empleyado sang City Social Welfare and Development (CSWD) nga si Jean.
Suno sa ginang nga ginkwestyon sang CSWD ang wala nila pagtulog sa ila balay kag ang paglumon sa balay sang iya nga half sister.
Gin-athag ni Patigan nga paano sini matulugan ang ila balay nga wala na sang balibung-an.
Ginpahayag pa sang tagreklamo nga ginpasalamatan sini ang half sister bangud sa pagbaton sa ila sang apo nga makatenir kag makatulog sa ila balay.
Naglain gid ang buot ni Patigan bangud naghambal pa si Jean sang nagpadulong sa ila lugar nga kuntani ginbaklan nila sang trapal ang balay kag gintulugan.
Indi man kuntani magreklamo si Nanay Florenda kun yara sa pagsulundan nga indi maka-avail ang mga nagalumon sa isa ka balay.
Apang may nahibaluan ini nga nagalumon kag may ikasarang sa kabuhi nga nakabaton sang tunga sa sako nga bugas.
Daku ang mabulig sa ila nga maglola sang bugas nga ginahatag sang city government, labi na karon nga wala sang trabaho kag nagapangita na lamang ini sang medyos agud mabuhi man sila sang iya apo nga amo ang iya kaupod.
Samtang nagreklamo man ang isa ka ginang sang Alba Village, Barangay Dinginan, sining syudad matapos nga wala man nahatagan sang tunga sa sako nga bugas.
Suno kay Nanay Lolita Ballos, iloy ni Manilyn Bernas nga may tatlo ka mga kabataan nga wala man sila sang nabaton nga bugas gikan sa city government bangud wala sang dingding ang ila nga balay.
Ini man ang rason nga indi mahimo matulugan ang balay bangud sin-o ang makatulog sa balay nga wala na sang dingding.
Ginpahayag pa sang ginang nga nagtinguha na nga mapahamtangan sang atop nga trapal ang balay sang iya anak agud bisan paano may teniran kun aga ang pamilya ni Bernas.
