ROXAS CITY – Nagapabilin sa ospital ang isa ka ginang matapos ang nagluntad nga aksidente sa Barangay Nasunugan, Dao, Capiz.
Ginkilala ang biktima nga si Emily Angeles, 41 anyos sang Barangay Ilas Norte, Dao, Capiz.
Sandig sa nangin imbestigasyon sang Dao Municipal Police Station nga sakay ang biktima sa motorsiklo nga ginamaneho sang iya bana nga si Rizal Angeles, 45 anyos nga magapadulong kuntani sa banwa sang Cuartero apang pag-abot sa national road sang Barangay Nasunugan ginaalegar nga hinali na lamang sila na- side swipe sang salakyan nga ginamaneho ni Dan Dariagan, 55 anyos sang Barangay Tacas, Jaro, Iloilo City.
Bangud diri, gilayon naman nga gindala ang biktima sa ospital matapos nga nag-angkon sang pilas sa lawas.
Samtang, temporaryo naman nga ginkustodiya sa Dao PNP ang driver sang amo nga salakyan nga naka-side swipe sa motorsiklo sang mag-asawa.
