ROXAS CITY – Kritikal sa ospital ang isa ka ginang matapos nabiktima sang hit and run samtang nagatabuk sa karsada sa atubang sang Roxas Memorial Provincial Hospital (RMPH) kaina sang aga.
Nag-angkon sang samad sa ulo kag nawala nga tiil ang biktima nga si Melda Togoto sang Barangay Hipona, Pontevedra, Capiz nga ginabulong karon sa ospital.
Nagaguwa sa inisyal nga imbestigasyon sang pulisya nga gikan ang ginang sa pagbantay sa iya pasyente sa RMPH kag nagatabuk na sa karsada para magbakal sang pagkaon kag bulong sang aksidente nga nasanggit sang nagaduag asul nga tricycle.
Ginpahayag nga may sakay nga mga pamatan-on ang nasambit nga tricycle nga sang natabo ang insedente, nahulog pa ang isa sa mga sakay sini.
Apang sa baylo nga dalhon sa ospital ang nahulog nga pasahero sang tricycle, gindala ini sang iya mga kaupdanan nga gilayon nagpalayo sa lugar.
Gilayon naman nga gindala sa ospital sang mga nakakita ang ginang agud madapatan sang nagakaigo nga pagbulong.
Nahibaluan nga magaguwa na kuntani subong nga adlaw ang ginabantayan nga pasyente sang ginang, matapos nga na-confine sa ospital sa sulod na sang pila ka semana.
