ROXAS CITY -Tuman ang kasubo nga nabatyagan sang isa ka ginang matapos nga ginbawian sang kabuhi ang bana nga nagpanawagan sang bulig sa Bombo Radyo Roxas.
Wala nakahingagaw ang mga bulig sang mga concerned citizens nga ginpalab-ut sa Bombo Radyo para ibakal sang bulong ni Mr. Roberto Apinan sang Sitio Sakop, Barangay Culasi sining siyudad matapos ini ang ginbawian sang kabuhi.
Suno kay Lydia Apinan nga hinali na lamang nga naglain ang pamatyag sang iya bana sang nag-abot sa ila balay gikan sa talatapan ni Vice Governor Jaime ‘Mitang’ Magbanua agud magpangayo sang bulig.
Gintuyo pa sang ginang nga paasuhan kuntani ang bana agud mapahagan-hagan ang iya nga hapo apang nagsenyas ini nga indi na siya makasarang sa iya nga sitwasyon.
Gindugang pa sang ginang nga nagbakod pa kuntani ang paglaum sang bana sa pag-ulan sang bulig sa ila pinaagi sa Bombo Radyo kalakip na ang ginpasalig nga bulig sang talatapan sang bise-gobernador.
Apang wala ini magdahum-dahom nga bawian na sang kabuhi ang iya nga mister.
