Ginpanginwala sang Armed Forces of the Philippines (AFP) ang mga ulat nga naga-conduct kuno sang military drills ang China sa West Philippine Sea, ilabi na sa palibot sang Bajo de Masinloc, kag ginpahayag nga propaganda lamang ini.
Suno kay Roy Vincent Trinidad, isa ka naandan nga taktika sang China ang pagpaguwa sang sini nga mga pahayag sa tion nga may military exercises ang Pilipinas kaupod ang iya mga alyado.
Ginpabutyag ni Trinidad nga wala sila nakakita sang organisado nga military maneuvers ukon joint formations sang mga barko sang People’s Liberation Army Navy kag China Coast Guard nga mahimo kabigon nga military exercise. Suno sa iya, nagkalain-lain lamang nga presensya sang mga barko ang nakita sa palibot sang Bajo de Masinloc.
Sa amo man nga tion, malampuson nga ginpatigayon sang AFP, Philippine Coast Guard kag United States Indo-Pacific Command ang lima ka adlaw nga Maritime Cooperative Activity sa lugar halin Mayo 26 tubtob Mayo 30. Lakip sa mga aktibidad ang search and rescue drills, maritime law enforcement training kag communication exercises nga nagatuyo nga mapabakod ang depensa kag koordinasyon sang Pilipinas kag Estados Unidos.
Samtang ginapahayag sang China nga nagpatigayon sila sang combat readiness patrols sa Scarborough Shoal, ginpabaskog sang AFP nga indi dapat dayon pati-an sang publiko ang mga amo sini nga propaganda
