ROXAS CITY – Nagpakigbahin sang hibubun-ot ang isa sa mga estudyante nga scholar sang CAPIS, matapos mahinam-anan nga mareleasan kag ginpahulat sang masobra isa ka oras sa guha sang governors hall.
Sa impormasyon nga nagikan kay alyas Joan, ginpahayag sini nga sadtong Sabado ang adlaw sang schedule of releasing kag magasugod alas 8:00 tubtob alas 12:00 sang udto.
Suno kay alyas Joan, nalate lamang sila kag ang iban nga mga estudyante sang duha ka minutos bangud ang iban may mga trangkaso kag malayo pa ang ginhalinan apang indi man suno diri instakto nga sa nasambit nga minutos indi na sila pagsapakon sa baylo ginpahulat pa sang inoras kag indi manlang matigayon nga mareleasan.
Dugang pa sini nga kun lantawon late na ang paghatag sa ila sang cash allowance bangud kun tani sadtong Agusto 3 pa ang schedule sang pagtagtaganay sa primero distrito apang naatrasar ini kag wala man sila nagreklamo angut diri.
Rason nga dako ang ila kaakig bangud sa duha ka minutos lamang sila nalate daw kaangay nga ginsilutan na sila nga ginpatindog sang madugay kag ang masubo pa ang iban may mga sakit nga ginabatyag.
Nakit-an man sila suno diri ni Mr. Paolo Roxas nga nagahulat sa guha sang governors hall apang wala lamang ini sang may ginhimo nga pamaagi ukon gin-istorya lamang sila.
Magluwas sa mga estudyante, ginsiling pa ni alyas Joan nga may mga ginikanan nga nagpadulong agud kun tani sila ang magakuha sang cash allowance bangud nagamasakit ang ila kabataan kag may dala man ang mga ini sang authorization letter, apang ginsilingan sila nga indi ini pagtugutan.
