ROXAS CITY – Ginhilway na sa pagka-aresto sa ospital ang isa ka ginapahayag suspek sa pagkabunggo patay sa isa ka 50-anyos nga lalaki sa Barangay Lonoy, Roxas City takna alas 2:45 sang hapon sadtong Hulyo 1.
Matandaan nga ginkilala ang biktima kay Edgar Catimbang samtang ang ginatudlo suspek amu si Reynan Buday 35-anyos kag backrider sini nga si Selvino Geronimo 24-anyos lunsay residente sang Mianay, Sigma Capiz.
Mahibaluan nga nagikan ang biktima sa puluy-an sang iya amay matapos nga nag-obra ini sang tulda sa may bahin sang Lonoy apang sang magatabok na kun tani ini sa highway sang Ivisan agud magabantay sang salakyan, aksidente ini nga nabungguan sang motorsiklo nga ginamaneho sang nasambit nga mga suspetsado.
Bangud sini, nag-angkon sang patal nga pilas si Catimbang nga gintunaan sang iya kamatayon.
