ROXAS CITY – Isa ka menor de edad ang ginapahayag suspek sa pagpanghaboy sang bato sa isa ka ceres nga nag-agi sa Barangay Sta. Cruz, Ivisan Capiz.
Sa interview kay Dan Usison, Acting Brgy. Captain sa amu nga lugar, ginpahayag sini nga base sa mga nakakita nga kabataan may yara sang nagapang-edaron 14-anyos nga bata ang nagsugid sa ila nga may yara ini sang ginhaboy sang bato nga van kag ceres sa lugar.
Suno kay Usison, pagka-aga pa sini nila nahibaluan ang amu nga insidente matapos makabaton sang tawag nagikan sa kapulisan kung sa diin may yara sang pasahero nga nagreklamo sa ila talatapan nga napilasan kag gindala sa ospital tuga sang pagpanghaboy sang bato sa Sta. Cruz sa nasambit nga banwa.
Pahayag pa sini indi ini ang una nga tion nga may natabo nga kaangay sini sa ila lugar bangud sadtong mga tinalikdan nga tuig may natabo man nga pagpanghaboy sa lugar apang maswerte lamang nga wala sang may napilasan.
Matandaan nga nag-angkon sang pilas sa bibig ang isa ka estudyante matapos nga naigo sang bato samtang nagasakay sa ceres bus.
Ginkilala ang biktima nga 21-anyos ang edad kag residente sang Barangay Dangula, Dumarao Capiz.
Sa karun, padayon pa ang pagpakig-angut sang mga opisyales sang amu nga lugar sa otoridad agud makilan-an ang yara sa likod sang pagpanghaboy subong man sa pagpangita sa ginatudlo nga suspek matapos pila na ka adlaw nga wala makapauli sa ila puluy-an.
