MAAYON, CAPIZ- Natigayon nga naaresto ang lalaki nga ginapahayag yara sa likod sang pagpanghold-up sa isa ka delivery rider sa Barangay Sibaguan, Roxas City sang tinalikdan nga Disyembre 19, Byernes nga adlaw pamaagi sa isa ka drug buy-bust operation sa banwa sang Maayon, Capiz.
Ang arestado amo si Joel De Doro, 31-anyos, manugbaligya sang isda kag residente sang Barangay Tabuc Sur, Panitan, Capiz.
Sa interview sang Bombo Radyo kay Police Captain Danilo Lauron, Officer-In-Charge sang Maayon Municipal Police Station, iya ginpahayag nga pamaagi sa kooperasyon sang publiko natigayon nga narekupo ang amo nga persona.
Suno kay Lauron, ipasaka sa amo nga lalaki ang kaso nga paglapas sa Republic Act 9561 ukon ‘Comprehensive Dangerous Drugs Act of 2002.
Pahayag niya, may posibilidad man nga madungan pagid ang kaso nga atubangon sini sa tion nga mapatud-an nga siya ang nagpanghold-up indi lamang sa delivery rider kundi pati sa iban pa nga mga biktima nga halin sa iban pa nga mga kabanwahanan sa probinsya sang Capiz.
Sa subong, nagapabilin ini sa kustodiya sang Maayon Municpal Police Station, samtang ginasigurado naman sang kapulisan nga magapadayon ang maid-id nga imbestigasyon agud mahatagan sang nagakaigo nga disposisyon ang kaso sang pagpanghold-up nga nabalhag sa probinsya.
Interviewed by Bombo Roadnie Daban Dalanon
