ROXAS CITY – Plantsado na ang kontrobersiyal nga isyu sa scholarship matapos nga nakuha na sang Contreras administration ang listahan/records sang mga scholars sa mga eskwelahan.
Ginpahayag ni Dr. Edwin Monares, provincial administrator nga sa pihak nga nagpadulong sila sa Davao City para sa Strategic Planning seminar, may gin-task sila nga empleyado nga nagpadulong sa mga eskwelahan kag nagpangayo sang records sang mga scholars sa diin magaserbe ini nga balasehan nga scholar gid man ang amo nga estudyante.
Apang sa mga estudyante nga kulang sa ginsumiter nga dokumento, ang gobyerno probinsiyal na mismo ang magapakig-angut sa ila.
Ginpanindugan ni Monares nga siguraduhon sang Contreras administration nga indi ma-pulitika ang matood nga scholarship program nga mangin epektibo sa tuig 2020.
Ini bangud luyag sang gobernador nga mangin estable kag ma-institutionalized ang scholarship program sa diin nagdihon sang scholarship ordinance si Governor Contreras nga ginsumiter sa Sangguniang Panlalawigan.
Ginbali man sini ang ginapaguwa nga isyu sang nagligad nga administrasyon nga luyag pauntaton sang Contreras administration ang scholarship program.
Ginkwestyon man ni Monares ang ginapaguwa sang anay provincial administrator Michelle del Rosario nga concern ini sa pag-eskwela sang mga bata.
Suno sa opisyal nga kun matood nga nagakabalaka si del Rosario sa mga scholars, kuntani nagbulig ini kag ginhatag na sa ila ang records nga madugay nila nga ginpangita.
Apang ang nagaguwa nga kasubong ginatum-ok pa sila sang nagligad nga administrasyon agud pakalainon sila sa publiko.
Liwat ginpanindugan ni Monares nga luyag sang gobernador sang estable nga scholarship program nga nasandig sa ordinansa.
