Ginatun-an na sang grupo sang mga archeologist kag paleontologist ang mga natukiban nga fossilized bones kag mga ngipon sang sapat sa Tabuk City, Kalinga nga ginapatihan nagikan sa isa ka elepante.
Nadiskubrehan sang mga residente ang presensiya sang mga ini sa isa ka lugar, kaupod ang mga petrified wood.
Gilayon naman nga nagpadulong sa lugar ang mga mga eksperto gikan sa Ateneo de Manila University, National Museum of the Philippines, kag iban pa nga international institution agud usisaon ang mga ini.
Ginapatihan nga pila sa mga tul-an nga nakit-an sa lugar ang kabahin sang sag-ang sang isa ka elepante, kalakip ang iya nga mga ngipon.
Una na nga nakarekober sang mga eksperto ang mga tul-an sang rhinoceros malapit man sa lugar, kalakip ang mga tul-an sang stegodon, kag iban pa nga mga kasapatan.
Base sa nauna nga resulta sang pagtuon sa mga ini, ang tul-an sang rhino ang ginabulubanta may edad nga 709,000 ka tuig.
Sa karon, ginaprotektahan sang gobyerno ang mga lugar kun sa diin natukiban ang mga ini samtang padayon nga ginatun-an ang mga narekober nga butang.
