CAPIZ-Padayon ang konstruksyon sang multi-purpose covered gym sa Sitio Proper, Barangay San Silvestre, banwa sang Pilar, Capiz, nga ginpondoan paagi sa 20% Development Fund sang Gobyerno Probinsyal sang Capiz.
Tinutuyo sang proyekto nga mahatagan ang mga pumuluyo sang mas maayo kag mas masaligan nga pasilidad para sa mga aktibidad sang komunidad, lakip ang mga programa sa isport, mga pagtililipon sang barangay, mga asambleya, kag nagkalain-lain nga aktibidad para sa kabataan kag senior citizens.
Paagi sa sini nga pasilidad, ginapaabot nga mangin mas hapos ang pagpatigayon sang mga programa kag aktibidad sang barangay, samtang nagahatag ini sang mas husto nga lugar para sa mga pagtililipon kag serbisyo publiko.
Magaserbe man ang covered gym bilang evacuation center sa tion sang mga emerhensya kag kalamidad, pareho sang baha kag bagyo, agud may mapadulungan ang mga residente nga kinahanglan maghalin sa ila mga puluy-an para sa ila kaluwasan.
Kabahin ini sang mga proyekto sang Gobyerno Probinsyal sang Capiz nga nagatuyo sa pagpauswag sang imprastruktura kag paghatag sang mas maayo nga serbisyo kag malawig nga benepisyo sa mga komunidad kag pumuluyo sang probinsya.
