ROXAS CITY – Wala nagpakigsapol ang staff sang City Health Office sa iloy nga taga-Barangay Culasi nga ginbalibaran nga makaanak sa ila birthing clinic sang sila ang ginpatawag agud mapamatian ang magtimbang nga kampo.
Nadismaya si Liezel Anonoy-Gregorio, 30 anyos sang Sitio Luyo, sang nasambit nga barangay nga sa hinyo ni City Health Officer Dr. Lory Cahilog nga magpakigsapol siya, wala man gali ang presensiya sang iya ginareklamo nga medical staff.
Sa pag-upod sang Bombo Radyo News Team, ang yara lamang sa amo nga sinapol amo ang apat ka mga doktor nga naga-duty sa nasambit nga talatapan.
Sa interview sang Bombo Radyo kay Liezel, ginpahayag sini nga ginpasaysay lamang sa iya ni Cahilog ang tanan nga nagkalatabo sang gab-i nga ginbalibaran siya sang nasambit nga birthing clinic.
Sa gihapon nagpanindugan si Liezel sa iya mga panaysayon batuk sa medical staff nga suno sa iya wala sila ginhatagan sang nagakaigo nga atensiyon kag ginbalibaran apisar yara na siya sa punto nga magabun-ag na ini sang iya lapsag.
Mahibaluan nga base sa alegasyon ni Liezel, ginhatagan lamang sila sang referral letter kag ginhambalan nga magkadto sa Roxas Memorial Provincial Hospital agud didto magbata rason nga napilitan na lamang sila nga maghalin bangud sa tuman nga pagkadismaya.
Ginpahayag sang ginang nga nagpangayo lamang sa iya sang pasaylo si Cahilog sa iya na-eksperyensiyahan.
Mahibaluan nga si Cahilog mismo ang nag-inisyar nga makighinala kay Leizel agud pamatian ang bahin sang ginang matapos nga una sini nga gin-usisa ang iya mga staff.
Apang nadismaya si Liezel nga sa nasambit nag sinapol, wala ang presensiya sang staff nga iya ginareklamo bangud suno kay Cahilog, yara ini sa banwa sang President Roxas.
Sang gintawagan man ini suno kay Liezel, wala man ini nagasabat.
Matandaan nga napilitan ang ginang nga mag-anak sa ila balay pinaagi sa isa ka paltera matapos ginbalibaran sang amo nga talatapan kag sang duha pa gid ka pribado nga birthing clinics.
