CAPIZ-Ginatos ka mga pumuluyo sang Indigenous Peoples (IPs) sa banwa sang Jamindan, Capiz, ang nakabenepisyo sa libre nga mga serbisyo panglawas sa ginpatigayon nga Gugma Medical and Dental Mission sang Gobyerno Probinsyal sang Capiz sa Barangay Agbun-od sang Oktubre 21, 2026.
Ang aktibidad naghatag sang kahigayunan sa mga pumuluyo sang Barangay Agbun-od, San Jose, Lucero kag Ganzon nga makapaidalom sa nagkalain-lain nga konsultasyon kag laboratory examination nga wala na kinahanglan magbiyahe sa mas malayo nga lugar agud magpangita sang amo nga mga serbisyo.
Lakip sa mga serbisyo nga ginpaabot sa komunidad ang medikal kag dental nga konsultasyon, CT scan, X-ray, electrocardiogram (ECG), complete blood count (CBC), random blood sugar (RBS) test, urinalysis, HIV screening, family planning kag tuberculosis (TB) counseling. Naghatag man sang libre nga bulong kag dental packages para sa mga kabataan.
Kabahin man sang aktibidad ang Indigenous Peoples Information and Service Caravan nga ginpangunahan sang Department of Social Welfare and Development (DSWD) Region VI, bilang kabahin sang pagselebrar sang Indigenous Peoples Month sini nga Oktubre. Nagpakigbahin ang nagkalain-lain nga ahensya sang gobyerno kag mga institusyon agud maghatag sang dugang nga bulig kag impormasyon sa komunidad.
Ginpanghatag man sa mga kabataan ang gift packs, tsinelas kag school supplies. Kaupod sa mga naghatag sang serbisyo ang Technical Education and Skills Development Authority (TESDA), Commission on Higher Education (CHED), PhilHealth, Department of Trade and Industry (DTI)-Capiz, National Commission on Indigenous Peoples (NCIP), Department of Health (DOH) Region VI kag Philippine Statistics Authority (PSA), upod ang iban pa nga mga ahensya kag institusyon.
Ginpangunahan ni Governor Fredenil H. Castro ang paghatag sang serbisyo, kaupod sanday Board Member Ma. Ivy Fundal, Jamindan Mayor Donnah Valdemar, mga opisyales sang banwa kag mga barangay, DSWD Assistant Regional Director for Operations Katherine Joy Lamprea, IP Community Leader Julieta Balbino kag mga representante sang nagkalain-lain nga ahensya.
Ang pagpalapit sang mga serbisyo sa mga komunidad sang Indigenous Peoples nagahatag sang dugang nga kahigayunan sa mga pumuluyo nga makapaidalom sa konsultasyon, makakuha sang kinahanglanon nga bulong kag makabaton sang impormasyon parte sa mga programa sang gobyerno, ilabi na sa mga lugar nga limitado ang access sa mga pasilidad panglawas kag iban pa nga serbisyo publiko.
