Ginatos nga kilo sang basura, nakolekta sa coastal clean-up sa Barangay Lonoy, Sapi-an, Capiz

Naglab-ot sa 485.5 kilos sang basura ang nakolekta sang Capiz Provincial Environment and Natural Resources Office ukon CaPENRO sa ginpatigayon nga coastal clean-up sa Barangay Lonoy, Sapi-an, Capiz.

Sa interview sang Bombo Radyo kay Reynald Dejapa, Environmental Specialist I sang CaPENRO, iya ginpahayag nga nagkalain-lain nga klase sang basura ang nakolekta sa baybayon sang nasambit nga barangay.

Ginpahayag man sini nga nga ginpatigayon ang aktibidad agud malikawan ang posible nga kahalitan sang basura sa mga marine resources ukon mga yamang dagat.

Ginapahanumdom man sini ang publiko nga paagi sa amo nga aktibidad mapalapnag ang importansya sa pagtinlo kag pagprotektar sang mga baybayon para sa masunod nga mga henerasyon.