Ginpasakaan na sang panumbungon nga large scale estafa kag 2 counts of carnapping ang ginatudlo CEO sang Peso to Million Investment scheme.
Sa pagpakig-angut sang Bombo Radyo kay Kapitan Alfredo Villanueva sang Barangay Gabuan, Roxas City, ginpahayag sini nga kasunod sa pagdangup sa konseho sang amo nga barangay sang mga nabiktima ni Jona Joy Manate ang panugyan sini sa mga tagreklamo nga magtingub para sa anuman nga legal nga tikang nga himoon.
Sa pihak nga nabawi ang duha ka mga salakyan nga ginalakipan sang SUV nga nagaduag brown kag ginapanag-iyahan ni Aileen Ramos kag isa ka pick up Navarra nga ginapanag-iyahan ni Rose Andrade, ginpasakaan sa gihapon sang 2 counts of carnapping si Manate.
Aminado si Kapitan Villanueva nga indi na makita karon sa ila lugar si Manate kag nag-untat man ang ginapatigayon nga konstruksyon sa iya nga balay.
Nagapati man ang opisyal nga nagapanago sa Iloilo si Manate matapos nabalahuba na ang ginhimo nga pagpanunto sa mga nakuhaan sini sang daku nga kantidad.
Nagplano man nga i-entrap si Manate, apang wala madakpan bangud posible nakatunog ini
Samtang gintuad pa ni Villanueva nga may isa ka barangay kapitan sa syudad ang nagpasimpalad sang iya swerte sa Peso to Million Investment Scheme.
