ROXAS CITY – Ginpanginwala sang ginatudlo nga suspek nga isa ini sa may kahimuan sang krimen kun sa diin ginbanggaan kag ginluthang ang driver sang aluminum wing van truck sa Sitio Perara, Barangay Dapdapan, Sapian, Capiz sang damlag lang.
Sa eksklusibo nga interview sang Bombo Radyo kay Fredgil Uguil, suno diri, wala sang kamatuoran ang ginahaboy sa iya sang biktima nga si Joey Maravilla, nga isa ini sa apat ka persona nga nagbangga sa ginamaneho nga salakyan sang biktima kag nagapangayo sang kwarta.
Sa panaysayon ni Uguil, takna 8:00 sang gab-i, Pebrero 15 yara siya sa restaurant nga ginapanag-iyahan ni Barangay Kagawad Ricky Villar nga naga-inom kaupod sang konsehal kag iban pa.
Imposible suno diri, nga ma-imbolbar siya sa insidente sa Sapian bangud wala man ini nakahalin sa lugar tubtob alas 11:00 sang gab-I.
Pahayag pa ni Uguil nga madamo sang makapamatuod sa iya alibi, bangud yara man ang presensya ni Kagawad Villar kag SB Member Jing Liego.
Wala man ini sang intensyon nga magpanago sa otoridad kag luyag sini nga limpyuhon ang iya pangalan bangud nahadlok na siya nga mabalik pa sa karsel.
Mahibaluan nga napresu na si Uguil sang tuig 2016 kag nakaguwa sang 2020.
Nagapanawagan naman ini sa biktima, nga kay-uhon sini ang ginbuy-an nga tinaga bangud malimpyo ang iya kunsensya.
