ROXAS CITY – Ginatos nga mga tumuluong-katoliko ang nag-upod sa selebrasyon sang Solemnity of Christ the King subong nga adlaw.
Mahibaluan nga mismo ang Bombo Radyo Roxas ang may yara sang live-coverage bilang pagpakita sang pag-ugyon sa aktibidad sang Simbahang Katolika.
Mahibaluan nga ginpahayag ni Monsignor Freddie Billanes, rector sang Immaculate Concepcion Metropolitan Cathedral (ICMC), nga ang selebrasyon sang Christ the King ang patimaan sang pagtakop sang Liturgical Year.
Tuman ka balaan suno diri ang nasambit nga selebrasyon ilabi na ang Enthronement sang Blessed Sacrament.
Angut diri, may ginpatigayon nga concelebrated high mass alas tres sang hapon kag ginsundan sang prosesyon sang Blessed Sacrament padulong sa Roxas City Immaculate Concepcion Metropolitan Cathedral.
Ginsundan ini sang enthronement, Act of Consecration and Benediction of the Holy Sacrament.
Mahibaluan nga ginpangunahan ni Most Rev. Jose F. Advincula, arsobispo sang Archdiocese of Capiz ang ginhiwat nga misa kadungan sang amo nga selebrasyon.
Si Capiz governor Esteban Evan ‘Nonoy’ Contreras naman ang nagbasa sang Consecration of Human Race to the Divine Mercy.
Samtang si Atty. Roging Dadivas, amay ni Roxas City Mayor Ronnie Dadivas, ang nagbasa sang Act of Dedication to the Immaculate Heart of Mary kag si Roxas City PNP Chief Lt. Col. Ricardo Jomuad naman ang nagbasa sang pangamuyo para sa Reconciliation and Harmony.
